അടിമാലി: കൊച്ചി ധനുഷ്‌ക്കോടി ദേശിയപാതയില്‍ ചീയപ്പാറക്ക് സമീപം ഓടികൊണ്ടിരുന്ന കെ എസ് ആര്‍ ടി ബസിന് മുകളിലേക്ക് മരശിഖരം ഒടിഞ്ഞു വീണു. പാലായില്‍ നിന്നും കാന്തല്ലൂരിന് പോകുകയായിരുന്ന കെ എസ് ആര്‍ ടി സി ബസിന് മുകളിലേക്കാണ് മരശിഖരം ഒടിഞ്ഞ് വീണത്. പാതയോരത്ത് നിന്ന ഉണങ്ങിയ മരത്തിന്റെ ശിഖരം ബസിന്റെ മുന്‍ഭാഗത്തേക്ക് പതിക്കുകയായിരുന്നു.
മരശിഖരം വീണതിനെ തുടര്‍ന്ന് ബസിന്റെ മുന്‍ഭാഗത്തെ ചില്ല് തകര്‍ന്നു. യാത്രക്കാര്‍ പരിക്കുകള്‍ ഇല്ലാതെ രക്ഷപ്പെട്ടു. നാല്‍പ്പതിലധികം യാത്രക്കാര്‍ ബസിലുണ്ടായിരുന്നു. പാല ഡിപ്പോയിലെ ബസിനാണ് കേടുപാടുകള്‍ സംഭവിച്ചത്.
മരശിഖരം പതിച്ചതിനെ തുടര്‍ന്ന് ഡ്രൈവറുടെ സംയമനത്തോടെയുള്ള ഇടപെടല്‍ ഉണ്ടായതിനാലാണ് കൂടുതല്‍ അപകടം ഉണ്ടാകാതിരുന്നത്. റോഡില്‍ നിരന്നു കിടന്നിരുന്ന പൊട്ടിയ ചില്ലുകള്‍ വെള്ളമൊഴിച്ച് റോഡില്‍ നിന്നും മാറ്റി. ദേശിയപാതയോരത്ത് അപകട ഭീഷണി ഉയര്‍ത്തുന്ന മരങ്ങള്‍ മുറിച്ച് നീക്കണമെന്ന ആവശ്യം ശക്തമായി നില്‍നില്‍ക്കുന്നുണ്ട്.
