അടിമാലി: അടിമാലി വൈ എം സി എയുടെ ക്രിസ്തുമസ് ആഘോഷവും കരോള്‍ഗാന മത്സരവും നാളെ നടക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.വിവിധ കേന്ദ്രങ്ങളില്‍ നിന്നായി നിരവധി ടീമുകള്‍ മത്സരത്തില്‍ പങ്കെടുക്കും. എ. ജോര്‍ജ് പുത്തന്‍പുരയില്‍ മെമ്മോറിയല്‍ ട്രോഫിയും 10,000 രൂപയും ഒന്നാം സമ്മാനം നല്‍കും. കുരുന്നപ്പിള്ളില്‍ കെ.സി പൗലോസ് മെമ്മോറിയല്‍ ട്രോഫിയും 7,500 രൂപയും രണ്ടാം സമ്മാനമായും പുത്തയത്ത് പി.വി ഏലിയാസ് നല്‍കുന്ന ട്രോഫിയും 5,000 രൂപയും മൂന്നാം സമ്മാനമായി നല്‍കും. അടിമാലി ടൗണിനു സമീപം മന്നാംകാലയില്‍ പുതിയതായി നിര്‍മ്മിച്ച വൈ.എം.സി.എ ഓഡിറ്റോറിയത്തിലാണ് മത്സരം. വൈ.എം.സി.എ ദേശീയ ജനറല്‍ സെക്രട്ടറി എന്‍.വി എല്‍ദോസ് ഉദ്ഘാടനം നിര്‍വഹിക്കും.യാക്കോബായ സുറിയാനി സഭയുടെ ഹൈറേഞ്ച് മേഖലാ മെത്രാപോലീത്ത ഡോ. ഏലിയാസ് മോര്‍ അത്താനാസിയോസ് മെത്രാപ്പോലീത്ത ക്രിസ്തുമസ് സന്ദേശം നല്‍കും. വൈ.എം.സി.എ പ്രസിഡന്റ് പോള്‍ മാത്യു അധ്യക്ഷത വഹിക്കും.നാഷണല്‍ എക്‌സിക്യൂട്ടീവ് അംഗം വര്‍ഗീസ് അലക്‌സാണ്ടര്‍ ഉള്‍പ്പടെ വിവിധ നേതാക്കള്‍ പങ്കെടുക്കുമെന്ന് അടിമാലി വൈ എം സി എ പ്രസിഡന്റ് പോള്‍ മാത്യു, വൈസ് പ്രസിഡന്റ് ജേക്കബ് പോള്‍, പ്രോഗ്രാം ചീഫ് കോ-ഓര്‍ഡിനേറ്റര്‍ ഡോ. ബിജു മാന്തറക്കല്‍, സെക്രട്ടറി രാജേഷ് ജോസ്,എം വി ജോസ് എന്നിവര്‍ വാര്‍ത്താ സമ്മേളനത്തില്‍ അറിയിച്ചു.
