ഇടുക്കിയിൽ പോഷകാഹാരക്കുറവു മൂലം 4 വയസുകാരന്റെ ആന്തരികാവയവങ്ങൾക്ക് ഗുരുതര ആരോഗ്യ പ്രശ്നം : വിഷയത്തിൽ ഇടപെട്ട് മന്ത്രിമാർ

ഇടുക്കി : മലമ്പണ്ടാര വിഭാഗത്തിലെ കുട്ടിയുടെ ആന്തരികാവയവങ്ങൾക്ക് ആണ് പോഷകാഹാരക്കുറവു മൂലം ഗുരുതര ആരോഗ്യ പ്രശ്നങ്ങളുണ്ടായത്. വള്ളക്കടവിലെ മലമ്പണ്ടാരം ഗ്രോതവിഭാഗം കുടുംബങ്ങൾക്ക് ഒരുനേരം പോലും മെച്ചപ്പെട്ട ഭക്ഷണം ലഭിക്കുന്നില്ല. ഇവർക്കായി ഉണ്ടായിരുന്ന കമ്യൂണിറ്റി അടുക്കളയുടെ പ്രവർത്തനം നിലച്ചതാണു കാരണം. 16 കുടുംബങ്ങളിലായി 54 പേരാണ് ഇവിടെയുള്ളത്. വനവിഭവങ്ങൾ ശേഖരിക്കാൻ പോകുന്ന ഇവർ ഇപ്പോഴും കിഴങ്ങുവർഗങ്ങളെ ആശ്രയിക്കുന്നു. അങ്കണവാടി, സ്കൂൾ എന്നിവിടങ്ങളിൽ എല്ലാ കുട്ടികളും എത്താത്തതിനാൽ കൃത്യമായി പോഷകാഹാരം ലഭിക്കുന്നില്ല. ഗർഭിണികളിൽ ഒഴികെ ഇവരുടെ ഇടയിൽ കാര്യമായ ആരോഗ്യപരിശോധന നടക്കുന്നില്ല.

വിഷയത്തിൽ മന്ത്രിമാരായ കെ.എ.തുളസി, ഷിബു ബേബി ജോൺ, ബിന്ദു കൃഷ്ണ എന്നിവർ തങ്ങളുടെ വകുപ്പുകളോടു വിശദീകരണം തേടി. കുട്ടിക്ക് അടിയന്തര ചികിത്സയും സംരക്ഷണവും ഉറപ്പാക്കിയതായി പട്ടികജാതി-വർഗ പിന്നാക്കക്ഷേമ മന്ത്രി കെ.എ.തുളസി പറഞ്ഞു. മാതാപിതാക്കളുടെ സംരക്ഷണമില്ലാത്ത സാഹചര്യത്തിൽ ചൈൽഡ് വെൽഫെയർ കമ്മിറ്റി, ജില്ലാ ചൈൽഡ് പ്രൊട്ടക്‌ഷൻ ഓഫിസർ എന്നിവരോടു കുട്ടിയെ സംരക്ഷിക്കാനുള്ള നടപടി എടുക്കാനും നിർദേശിച്ചു.

മലമ്പണ്ടാര വിഭാഗത്തിലെ കുട്ടികൾക്കു പോഷകാഹാരങ്ങൾ അവർ കഴിയുന്ന സ്ഥലങ്ങളിൽ എത്തിച്ചു നൽകാൻ വനിതാ – ശിശുക്ഷേമ മന്ത്രി ബിന്ദു കൃഷ്ണ നിർദേശം നൽകി. കുമളിയിലെത്തിയ വനം മന്ത്രി ഷിബു ബേബി ജോൺ ഭക്ഷണവിതരണത്തിനായി വള്ളക്കടവിൽ കമ്യൂണിറ്റി അടുക്കള പുനരാരംഭിക്കുന്നതു സംബന്ധിച്ചു ആലോചിക്കുമെന്നു വ്യക്തമാക്കി. വള്ളക്കടവ് സ്വദേശിയായ കുട്ടി സിവിയർ അക്യൂട്ട് മാൽന്യൂട്രിഷൻ അവസ്ഥയിലാണ്. തുടർ ചികിത്സയ്ക്കായി അടുത്തദിവസം കോട്ടയത്തെ കുട്ടികളുടെ ആശുപത്രിയിൽ എത്തിക്കും. നിലവിൽ അങ്കണവാടി ജീവനക്കാരുടെ സംരക്ഷണത്തിലാണ് കുട്ടി