അടിമാലി: അടിമാലി കുമളി ദേശീയപാതയില് കത്തിപ്പാറക്കു സമീപം ഇറക്കത്തോടു കൂടിയ കൊടുംവളവ് അപകടഭീതി ഉയര്ത്തുന്നു. കൊടും വളവും ഇറക്കവും നിറഞ്ഞ ഭാഗമാണിവിടം.കൂടാതെ പാതയുടെ ഫില്ലിങ് സൈഡ് കുത്തനെയുള്ള ചെരി വാണ്. ഏതെങ്കിലും സാഹചര്യത്തില് വാഹനം ഇവിടെ അപകടത്തില്പ്പെട്ടാല് പതിക്കുക വലിയ കൊക്കയിലേക്കാകും.കഴിഞ്ഞ ദിവസവും ഇവിടെ ഒരു കാര് താഴ്ച്ചയിലേക്ക് പതിച്ചു.കാര് യാത്രികര് അത്ഭുതകരമായി രക്ഷപ്പെട്ടു. മുമ്പും ഈ ഭാഗത്ത് അപകടങ്ങള് സംഭവിച്ചിട്ടുണ്ട്.
ഈ സാഹചര്യത്തിലാണ് ഇവിടെ സുരക്ഷാവേലി സ്ഥാപിക്കണമെന്ന ആവശ്യം ഉയര്ന്നിട്ടുള്ളത്. ബി എം ആന്ഡ് ബിസി നിലവാരത്തില് ടാറിങ് ജോലികള് നടന്നിട്ടുള്ളതിനാല് വലിയ വേഗത്തിലാണ് ഇതുവഴി വാഹനങ്ങള് കടന്നുപോകുന്നത്. എന്നാല് പാതക്കിവിടെ വേണ്ടത്ര വീതി യില്ലാത്തതും അപകട സാധ്യത വര്ധിപ്പിക്കുന്നു.
ഇവിടെ നിന്നിരുന്ന മരങ്ങളും മറ്റും കൃഷി ആവശ്യത്തിനായി നാളുകള്ക്ക് മുമ്പ് മുറിച്ചുമാറ്റിയിരുന്നു. ഇതോടെയാണ് ഇവിടെ പതിയിരിക്കുന്ന അപകടക്കെണി കൂടുതല് വെളിവായത്. വാഹനം ഏതെങ്കിലും സാഹചര്യത്തില് ഇവിടെ നിന്നും താഴേക്ക് പതിച്ചാല് അത് വലിയ ദുരന്തത്തിന് ഇടവരുത്തും. ഈ അപകട സാധ്യത അടിയന്തിരമായി ഒഴിവാക്കണമെന്നാണ് ആവശ്യം.
