അടിമാലി : മാങ്കുളം ടൗണിന്റെ പ്രധാന കേന്ദ്രങ്ങളില്‍ കൂടുതല്‍ ഹൈമാസ്റ്റ് ലൈറ്റുകള്‍ സ്ഥാപിക്കാന്‍ ഇടപെടല്‍ വേണമെന്നാവശ്യം. വിനോദ സഞ്ചാര സാധ്യത വര്‍ധിച്ചതോടെ വളര്‍ച്ചയുടെ പാതയിലുള്ള ടൗണാണ് മാങ്കുളം ടൗണ്‍. മുമ്പ് റേഷന്‍ കട സിറ്റി, പള്ളി സിറ്റി, പട്ടക്കട സിറ്റിയെന്നിങ്ങനെയായിരുന്നു ടൗണ്‍ സ്ഥിതി ചെയ്തിരുന്നതെങ്കില്‍ ടൗണ്‍ വികസിച്ചതോടെ പുതിയ കെട്ടിടങ്ങളും വ്യാപാര ശാലകളും വരികയും ടൗണുകള്‍ ഒന്നായി മാറുകയും ചെയ്തിട്ടുള്ള സ്ഥിതിയുണ്ട്. ഈ സാഹചര്യത്തിലാണ് ടൗണിന്റെ പ്രധാന കേന്ദ്രങ്ങളില്‍ കൂടുതല്‍ ഹൈമാസ്റ്റ് ലൈറ്റുകള്‍ സ്ഥാപിക്കാന്‍ ഇടപെടല്‍ വേണമെന്നാവശ്യമുയര്‍ന്നിട്ടുള്ളത്.
ടൗണിലെ പ്രധാന ഭാഗമായ പള്ളിസിറ്റിയില്‍ മാത്രമാണിപ്പോള്‍ ഹൈമാസ്റ്റ് ലൈറ്റുള്ളത്. റേഷന്‍ കടസിറ്റിയിലും ഫെഡറല്‍ ബാങ്ക് പരിസരത്തുമടക്കം കൂടുതല്‍ ലൈറ്റുകള്‍ സ്ഥാപിച്ച് ടൗണിനെയാകെ രാത്രികാലത്ത് പ്രകാശപൂരിതമാക്കേണ്ടതുണ്ട്. മാങ്കുളത്തിന്റെ വിനോദസഞ്ചാര മേഖല വളര്‍ന്നതോടെ രാത്രികാലങ്ങളിലും വിനോദ സഞ്ചാരവാഹനങ്ങളും ആളുകളുമൊക്കെ ടൗണിലൂടെ കടന്നു പോകുന്നു. ജീപ്പ് സഫാരി പൂര്‍ത്തിയാക്കി സഞ്ചാരികള്‍ പലപ്പോഴും രാത്രികാലത്താണ് മാങ്കുളത്തു നിന്നും മടങ്ങാറ്. ടൗണ്‍ പ്രകാശ പൂരിതമായാല്‍ സഞ്ചാരികള്‍ക്കുള്‍പ്പെടെയത് സഹായകരമാകും. ടൗണിന് പുറമെ പഞ്ചായത്ത് പരിധിയിലെ പ്രധാന ഇടവഴികളും കവലകളും വിനോദ സഞ്ചാരികള്‍ എത്തുന്ന ഇടങ്ങളുമൊക്കെ പൂര്‍ണ്ണമായി പ്രകാശമാനമാക്കാനുള്ള ഇടപെടല്‍ വേണമെന്ന ആവശ്യവും ഉയരുന്നുണ്ട്.
