ബൈസണ്‍വാലി സര്‍ക്കാര്‍ ഹയര്‍സെക്കണ്ടറി സ്‌കൂളില്‍ നിര്‍മ്മിച്ച പുതിയ കെട്ടിടത്തിന്റെ ഉദ്ഘാടനം നടന്നു
അടിമാലി: ബൈസണ്‍വാലി സര്‍ക്കാര്‍ ഹയര്‍സെക്കണ്ടറി സ്‌കൂളില്‍ നിര്‍മ്മിച്ച പുതിയ കെട്ടിടത്തിന്റെ ഉദ്ഘാടനം നടന്നു. സ്‌കൂളിന്റെ അടിസ്ഥാന സൗകര്യ വികസന വര്‍ധനവിന് സഹായിക്കുന്നതാണ് പുതിയ ബ്ലോക്ക്. നവകേരളം കര്‍മ്മ പദ്ധതി വിദ്യാകിരണം മിഷന്റെ ഭാഗമായി മൂന്ന് കോടി രൂപ ഉപയോഗിച്ചാണ് കെട്ടിടം നിര്‍മ്മിച്ചിട്ടുള്ളത്. സംസ്ഥാനതല പരിപാടിയില്‍ മുഖ്യമന്ത്രി പിണറായി വിജയന്‍ ഓണ്‍ലൈനായി കെട്ടിടത്തിന്റെ ഉദ്ഘാടനം നിര്‍വ്വഹിച്ചു.
സംസ്ഥാനതല പരിപാടിയില്‍ വിദ്യാഭ്യാസ വകുപ്പ് മന്ത്രി വി ശിവന്‍കുട്ടി ഓണ്‍ലൈനായി ചടങ്ങില്‍ അധ്യക്ഷത വഹിച്ചു. സ്‌കൂള്‍ തല പരിപാടിയില്‍ അഡ്വ. എ രാജ എം എല്‍ എ ശിലാഫലകം അനാച്ഛാദനം ചെയ്തു. ചടങ്ങില്‍ ത്രിതല പഞ്ചായത്തംഗങ്ങള്‍,ഉദ്യോഗസ്ഥ പ്രതിനിധികള്‍, പിടിഎ ഭാരവാഹികള്‍, അധ്യാപകര്‍, മറ്റിതര സംഘടനാ ഭാരവാഹികള്‍ തുടങ്ങിയവര്‍ പങ്കെടുത്തു.ഇരു നിലകളിലായിട്ടാണ് സ്‌കൂളിന്റെ പുതിയ കെട്ടിടം പണികഴിപ്പിച്ചിട്ടുള്ളത്.
